Mingaw

Buenas!

Mingaw, tanan siguro ta mobati nan ini, amo?  Isa siguro sa at kuman tagmingaw nan butang, tawo, pagkaon, o misan ini blog na ya nay update.  Ako, tagmingaw kan anhin Papa, tagmingaw nan ini blog, ugsa na-update kuman, tagmingaw kaligo sa dagat, sanan madabo pa kamingawan.

Sa sunod na mga adlaw, buyan sanan tuig, ini ako mga kamingaw, kadugangan pa.  Pero hinaut di tanto kon dabo.  Sa ya kahibayo, mag-industry immersion matud ako sa Seoul, South Korea.  Isa ka tuig ra man hinuan, pero ay-ay, jaon isa o duha ka adlaw ako mawaya sa bayay, amo raman isa katuig na. 

Sa panahon kuman, jaon namay internet sanan cellphone, laong pa “one click away” rakan, istorya na kamo nan imo pamilya, makit-an pa nimo sa webcam.  Pero lahi ra gajud….inday lam.

Na hala, dire rakan anay kutob, plastar pak nan mga dad-unon.  Sugod na an kamingaw…  

Happy Easter

Magmalipajon, sa pagkabanhaw sa ato Manluluwas na si Kristo!

Didto kami namanik sa Ina Poon Bato sa Magasang nan Hwebes Santo.  Iban nam si Linvs.  Nagpakugos kay nahadluk, ay bugat-bugat na, nagbagibi ak huyas, amora nagpas-an ak krus, pero ok ra.

Kaina, nosimba si wifey.  Ya kami kasajo pagmata ni Linvs, ngajan hapon rakan kami simba.

Na hala, dinhi rakan anay kutob.  Happy Easter utro!

Salamat sab Sir

Mamahiyom na sab ta.

Ganing ra gajud jaon magpasalamat ta kon may ato mga hangjo o tagaylo sa iban na tawo.  Hubin grasya gikan sa taas.

Nan pagbyahe nako pauli gikan sa Cebu, noagi an jeep sa may Hayangabon, may nagrequest mangihi.  Hunong anay an jeep, dakan sab makapanhunat mga pasahero.  Tag-ihi sab tuho ako.  Pangihi ko…

Human ko pangihi, nagbutang ak sinsilyo sa box. 

Waysapayan sab Sir…hehehe

————————————————

Pasalamat sab ako na misan dili Tagalog, Binisaya o Ininglis ini ak blog, pagcheck ko kaina, noabot na sa…

 …an nobisita hapit duha ka tuig na an milabay.  Hinaut modabo pa an mobisita, sanan magdugay pa ini ato panagiban.  Na hala, salamat utro…

Tinibu upat

 Buenas!

Kadabo na adto mga nahitabo dinhi sa lungsod, ya gajud nak kapost.  Nan pagbagong tuig, pag-”wayo-wayo” o pag-uyan nan miaging buyan, pag-Vday, mga byahe nak. Sige lam, isa-isahon ko kuman.

“Malipajon na Bag-ong Tuig!”

Tagsugat an bag-ong tuig nan uyan.  Grabe man adto na uyan, didto ak makadungog nan panultihon na “wayo-wayo”.  Pero mabibo man gihapon dabo nagpabuto, didto matud kami maniudto sa Bun-ot, higup sabaw nan tinuya.  Sa ubos, retrato nan pag-uyan.  Salamat kan pre Tony Arreo sa piktyur.

“Belated Happy Heart Day!”

Nay may nagconcert matud dire adiser mag-Valentines Day, isponsoran nan SMB sanan Bardugs.  Lingaw sab, duha ka banda, nagkuyang gan nan lamisa, pero lingaw.

Ya si wifey motan-aw, pagkasilom rakan kami nagdate, sa Chanlac nanihapon, taghimagasan nan ice cream. hehe

Trabaho

Isa sa mga rason ya nak ma-update ini blog, kay nabesi sa trabaho.  Dabo trips, didto ak sa Davao, Tandag, Cagwait sanan sa Butuan.  Ugsa mga tinibu na ini mga posts.  Mga retrato sa ubos.

Resolution

Nagproblema ako nan ak mga baro kuman, kay bagan nan-gagmay man. hehehe O, akoy nodako?  hmmmm new year’s resolution lagi nako magpagamay, ugsa nagsugod-sugod ako pag-”fruit diet”. 

Inday kon makasurvive, kay kadabo na temtasyon.

Na uman dinhi rakan anay kutob kay adtoy nanhagad panihapon. hehehe 

Pasko!

Malipajon na Pasko matud sa tanan! Umay at pan-Noche Buena?

Tag-check ko post nak last December, ya may matud ako pinost.  Tan-awon ko tana unoy am taghanda jadto.

Mapawa man matud an lungsod, labina an plaza.  Didto kami nan isa na duyom, tanaw pamutang nan mga lights.

Kuman amo ini kapawa…

An sa munisipyo…

Nan isa na semana matud an am Christmas party sanan nila Linvs.  Mabibo isab, mga kaiban nak sa department.

Na uman, dinhi rakan anay kutob kay nagbilang na, manimba pa kami.  Duhay misa kuman, alas 9:00 sanan alas 11:00.

Pasko utro! 

Chence

Mamahiyom ta anay.

Di baja kon tinuod jaon panultihon na “only the word change will never be changed“. 

Nan isa na adlaw may ak tagpalit sa isa ka tindahan, nakay 1k man an ak kwarta sanan ya pay sinsilyo nan tindahan, laong an tindira na balikon ko ra an sinsilyo.

Pagbalik ko…

Pahiyom rakan ako… pero si Ninoy nagsakmuyo. hehe

Tinibu tuyo

 Halu, umay ayo?  Kabasa man siguro kamo sa plurking nako, kuman pa gajud mibalik-balik an signal sa internet.  Naapektuhan nan paglinti-kilat nan miaging Bernes.

Magtinibu nasab ak anay nan post. hehehe  Unahan ta nan jadto miaging semana, jadto paglinti-kilat, kusog man an uyan, yay sab pajong nak na daya, nag gosing rakan anay kami nan ak kaiban sa lab, si panks.

Sa ak jaon computer, seryoso karajaw sija pagkanta, amo siguro adto pagkusog nan linti  pagsingit nija kanta. hehehe payts pangks…

Pagkadomingo, laban ni aydol, Pacquiao.  Tanan tawo siguro sa Cantilan di mahinali. Pati gan sab ako.  Yay tawo sa dayan, si Wayti ra siguro an nagkitaw-kitaw. hehee  

Hangtud gajud nahitabo an tagpaabot, nakadaug si Manny.  Amo ra sab nakadaug ako, bisan ya ak pusta, am bata, nakasabot baja nan boxing, nagkalipay sab sija.  Kalaung ko majuyots si Linvs. hehehe

Lingaw sab.  Nan pagkalunes, pista sa Pag-antayan.  Opkors, may nangimbitar.  An ak na-abtan sa isa ka bayay an nanharana.  Piktyur sa ubos.

Madabo ila tag-kanta, madabo-dabo sab ak nakaun. hehehe

Nan kaina, may am seminar.  Isa ako sa mga speakers.  Pero inday kon maaya an ak topic kay ubay-ubay man sab an nangatuyog. hehehe

Inday lam.

Si Andress Bow

“si andres bonifacio, atapang atao,aputol a kamay, hindi atakbo,
aputol a paa, hindi atakbo,
apugot a ulo, hindi atakbo
aputol a o__n, atakbo atulin….”

- bata

hehe makadumdom man dajon ak jaon na tula sa una, kon adlaw ni ter Boni.  Kuman man matuod an ija birthday.  Kuman na adlaw dabo kabirthday nija, sa SSIT ra daan tuyo sila, isa si Mama.  Sa mga ‘kilaya’ na tawo si Winston Churchill, Mark Twain, Billy Idol, Ben Stiller, sanan iban pa.  Nakilaya sija na “Father of the Philippine Revolution”, pero inday kuman kon kilaya pa sija nan mga kabatanunan?

Isa sa nagbirthday sab an “Mother of the Cantilangnon Blogger” hehe si mama.  Nagsabot kami nan ak maguyang na isurprise nam sija, kami maghanda nan ija ika-60th birthday.  May sab mga bisita, kalumunan, silingan sanan kaiban sa trabaho.

Hirayan ta naman, hapit naman matud an Pasko.  Silom Desyembre na, ugsa sa iskuylahan sugod na pandekorar nan mga rooms.  Piktyur sa ubos.

Sa ak office ya pay dekorasyon, palit pak nan laong pa mga “tseres” (series lights) sa WSS. hehe

Nan miaging semana matud didto ak sa Manila, attend nan conference sa IT.  Didto iheld sa, tukmaa…sa Rizal Technological University, sa Mandaluyong.

Diba bagan jaoy mga lalis na an dapat tana ma-National Hero si Bonifacio?  Amora kapamilya sanan kapuso, naglalis sinoy number one. hehehe Ugsa gajud baja siguro yay pagkahiusa mga Pilipino.

Inday lam.

Sa pamahaw

“Gumising ka na at maghilamos, Pilipinas!  Masarap ang almusal!” - Bob Ong      

Balitaw, umay ijo pamahaw kuman?  Kalami nan tabliya, paresan nan biko sanan manga.  Pero an laong, bagan maka-high blood sanan diabetes man sab jaon.  Inday lam.

Karian ta naman, nan didto matud kami sa Cebu nan isa na buyan, nagpalit ak nan mga libro tagsuyat ni Bob Ong na ABNKKBSNPLAko?!, Bakit Baliktad Magbasa ng Libro Ang Mga Pilipino?, Ang Paboritong Libro Ni Hudas, sanan iban pa.

Lingaw sab basahun, tag-istorya nija (nan nagsuyat) mga eksperyensa o inagihan nija sa kinabuhi pagka-Pinoy.  Inday lam kon tinuod tanan, pero makatawa kaw kay pati ako makahuna-huna na naagihan ko nanam sab jaon ija tagsuyat.

Kuman, hapit na nak mahurot pagbasa.  Kada buntag ko basahon, jaon mamahaw kami.  Sakto gajud jaon sugdan nat an adlaw nan katawa, papugong sab sa high-blood sanan diabetes.  hehehe

Pangutana Isa

Nakabantay kamo nan ini na mga signs (board, stickers, tarpaulin, etc), tagbutang sa mga tindahan, opisina, bayay, kotse?

An ako pangutana, may subliminal message kaha ini tagbutang na an paliton sa Pilipinas nagmahal na?  

Pangutana ra. 

Tinibu duha

Happy Halloween sa tanan.

Musta, umay lingaw nat kuman?  Ako, kalingawan nak kuman anay huna-huna balik nan ak mga tagkalingawan nan miaging mga semana.  Hala, isa-isahon ta.

Nan October 5 kuman na tuig, birthday nako baja.  Kadungan nak an pagselebrar nan World Teacher’s Day.  Katiming isab amo?  Adlaw namo mga maestra sanan maestro.  May gamay nam ni wifey na handa sanan bisita, kay sunod man an am birthday, an ija nan October 6.  Retrato jaon sa ubos.

Hala, uno paman? Taympa…

Nan kabertdihan matud ni neng, nandistribute an TESDA nan scholarship para sa short term courses.  Nagtukar nasab kami.  Sa sige nak gitik banduria, tagkubajan na an tumoy nan ak tudlo, pero sige lam, ok ra.  Nan sunod na semana, iban ak sa Educational Tour nan mga studyante sa Cebu.  Ok sab an panaw, dabo hibayan an mga studyante gawas sa upat ka dingding nan room.  Piktyur sa ubos.   

Ugsa ya ak kapamiktyur nan pag-Adlaw nan Cantilan.  Didto paman kami adto sa Cebu.  Salamat kan Tony Arreo, namiktyur man baja sija, nagcopy rakan ako.  Jaon dire makita an mga retrato matud nan pag-Adlaw.

October 17 matud nag Family Day an SSIT, sa Consuelo.  Mabibo isab kay tanan empleyado didto man.  Sunod na adlaw an lipay karajaw, kay Recognition Day nila Linvs.  Kalipay kami kay isa sija sa mga outstanding pupils nan school.  

Adto miaging Domingo, may special meeting an Bardugs.  Member na matud ako.  Dugay ra nako gusto moapil sa mga organizations na may ganing na tumong sa publiko (public service).  Gusto nako ipadajon an legacy nila lolo sanan papa.  Si lolo matud, grand master nan mason, si papa APO (Alpha Phi Omega), ako, proud to be Bardugs member. naks hehehe  mga piktyurs matud sa ubos.

Na uman dinhi rakan anay kutob kay kadto pak sementeryo.  Hala, Happy Halloween utro!  

Balikon ta

Hala, nag-isa ka tuig naman baja kahapon, an pagsulong sa Cantilan.  May ak post matud dire.  Balikon ta rakan anay sa pagtan-aw mga retrato sa ubos, nan jadto pagkahitabo.

Sa last nak na post may ak tangutana, “Umay at leksyon na makuha sa ini na panhitabo?”  Dabo siguro, amo?  Kuman kon mosuroy kaw sa munisipyo, nakakoral na an istasyon nan pulis, apil sab an tribunal.  Alerto na sab siguro an at mga magbalantay sa kalinaw.  Jaoy sab siguro mga ordinansa, mga balaud na taghimo para sa jadto nahitabo.  Kay dakan sa utro, kun sulongon na sab, simbako, aw ya ta kahibayo.

Pero laong pa, hinaut last na adto.  

Bas-oy

Nan Sabado matud, ak tagtestingan an recipe na bas-oy gikan dire.  Lami, kuyang lam nan repolyo, molami gajud tana samot.  Sa sunod weekend rakan nasab.

Sige, huna-hunaa rakan nijo na malami. hehehe

Tinibu

Buenas!

Tib-un ko rakan ak post nan ak mga kalihukan nan miaging semana.

Nan Bernes sanan kahapon matud may am seminar-workshop sa PMS-OPES nan Civil Service.  Jaon speaker sa taas, si CSC Provl. Dir. Pareja. Laong sija motaasay naman kuno an sweldo nan mga empleyado sa goberno.  Arang-arang da kay para di ta makahuna-huna magpa-Dubai.

Human seminar matud kahapon, agihan ko si wifey sa botika.  Kay man halo-halo kami iban si Linvs.  Pero papiktyur anay sija adiser kami namanaw.

Samtang libot-libot kami hae man halo-halo, namiktyur ak anay mga kabag-ohan dire sa lungsod.  Tagsemento na matud an iban na mga dayan.

Isa an Falcon corner Urbiztondo na dayan (piktyur sa taas), pasingod gani sa tyangehan.  Pero dunggan ko, kutob ra kuno sa RHU.  Uman kinta kon deretsohon rakan, pila ka dupa rakan man jaon.

Apil sab matud an sa plaza nat, taglevel an semento.  Hapit naman matud an “Adlaw nan Cantilan”.  

Sobra iskatuig naman matud noingkod an at tamutuhan pag-eleksyon.  Uno namay matud mga kalambuan nan Cantilan?  Haman ta kaaju nan State of Cantilan Address ni Mayora o mga SB legislations nan miaging tuig hangtud kuman?  Kadto rak sa munisipyo.

Pero adiser ta moderetso sa lain na topic… 

…basta lingaw si Linvs nan halo-halo kabii.  Aja pagpili-a an gilatin na green, akoy nagtapos kaon. hehehe

Sige amora anay adto.  Happy Sunday sa tanan! 

An tinuya, kasal sanan flags

Musta na?

Kabii pa nak tana iupdate an blog, nakay permi ak mailugan ni Linvs maginternet to ija mga flags.

Tagpalitan ko matud sija nan poster nan tanan mga flags sa kalibutan, ugsa hapit na mamemorize nija an tanan.  Natuyog sija kabii, tapad an flag nan Pilipinas. hehehe 

Kahapon, didto matud kami sa Bon-ot iban si wifey,  nanibong sa kasal nan ak estudyante sanan assistant sa botika. 

Nangaulahi kami pag-abot, adtoy ak hindungan nolaung, “atoy hugason”. hehehe Nakay taglamisahan dajon kami nan puro karne, ugsa…

…kaina buntag sajo ak minmata, nagtuya nan isda pinalit ko kabii.  Higop-higop ak sabaw, nanalinga kan Don Moen, samptang naguyan sa gawas.  Kalami lam sa kinabuhi. 

Gitik

Buenas!

Laong pa nila, ‘ato pay humba?’.  Na tangaliguan na galing.  Balitaw, marajaw na liwas pista.  Kaluoy sa Dios, generally peaceful an pista.  May ginagmay na gubot, pero alerto man an at mga magbalantay nan kalinaw.

Human kintahay nan mga aktibidadis nan pagpista, tagsundan na sab nan lain.  Isa an pagpraktis nan banduria (may ak post bahin sa jaon dire), kay magperform kuno kami sa culmination program nan Buwan ng Wika.  Kaina hapon an programa, kami an pinakauna nag-intermission.     

Laong ni Sir Dods, ‘gitik lam je bisan panyagsa rakaw kapraktis’, kalooy sa Dios, nakatukar gihap nan jadto tuyo ka kanta ak nahibayan. hehehe

Bahay Kubo, Curatcha sanan Cha-cha an am tagtukar.    

Marajaw na Pista sa tanan!

Nabesi pa man kuman, mga links lam anay ak ibutang para sa mga piktyurs nan mga kalihukan kuman pista, apil na pag Sirong kahapon. Iclick lam jaon mga links sa ubos:

Grand Parade

Sirong Street Dancing

Sirong Final Showdown

Others

Salamat.

Mga karajawan kuman Pista

Pista!

Hapit naman matud an pista, mga retrato rakan anay nan mga karajawan kuman pista an ak ipost.  Iclick rakan sab ini sanan dire para sa iban na mga piktyurs.  

Para sa schedule of activities iclick ini.  Sige, dinhi rakan kutob, mag-istorya rako.  Pista utro!

Uyan sa San Miguel

Kahapon miabot ak gikan sa SSPSC-San Miguel Campus.  Duha ka adlaw kami didto, nagmonitor nan mga klase sanan kurso ila tag-offer.  Natigajon sab an am panaw, iban nan kakuyba. 

Nan Lunes kami nangadto, mga tuyo ka checkpoint amo taglabjan.  SONA man matud ni PGMA jadto na adlaw, ugsa red alert siguro.  Pag-abot nam sa campus, ok man, kalooy sa Dios yay problema nasugatan.

Uyan an nosugat hino sa amo.  Huna-huna ko, blessings siguro para sa campus sanan sa lugar mismo.  Pero samtang nakig-istorya ako sa faculty, tagduol kami nan mga bata.  Basa nan uyan, nagdaya nan nangka, baligja kuno.

Tagpalitan ko nan isa, sanan tangutana.  Ya mag-iskuyla kuno sila, notabang sa ila ginikanan namaligja kon unoy mahibaligja.  Ay-ay, nagsakit ak dubdob paghidungog. 

Ya man ak kadungog sa SONA ni PGMA, pero uno na baja adto ija mga plano sanan  proyekto, bagan ya man moabot sa San Miguel?

Hinaut unta adto na uyan, maghatag nan paglaum sa mga tawo sa San Miguel na sa kada human nan uyan jaoy pirme bag-o na adlaw moabot.     

Nabesi

Buenas! 

Musta na?  Hala, hapit naman mag-isa ka buyan, ya maupdate an blog.  Nagsunod-sunod man gud an trabahuon nan miaging mga simana.  Ak isa-isahon rakan kuman.

An iskuylahan (SSPSC-SSIT), nagpa-accredit matud nan mga program offerings, labina an computer courses sanan hrm.  Arang kadabo na requirements, sanan mga hapit 30 ka  accreditors (gikan sa taglain-lain na iskuylahan) an nanganhi.  Ugsa ya gajud kaatiman anay an blog.  

Human nan accreditation, attend ak nan consultation meeting (sponsored by CHED-TC GAIL) sa UM-Davao.

Isa ra hino ka adlaw an meeting, pero sa kalajuon nahimo tuoyo kaadlaw.

Nan didto pak sa Davao, tagtawagan ak ni pre Gerry na jaoy kuno training nan TESDA, isa ka simana, sa STC, Tandag.  Na, unhon nalam an ak klase, laung ak sa kaugalingon.  Pero magmake-up class rakan ako kada sabado.

Human nan training, nagparetrato dajon an grupo.

Silom mangadto kami, iban an VPAA, sa SSPSC-San Miguel Campus, magmonitoring .  Haay nalam, tagluja nako. 

Pero lujo sa mga pagkabesi nat, malingaw rakan man lam ta.  Pareha kuman, hapit na an pista, sugod-sugod na matud an amateur sa plaza.  Jaoy retrato sa ubos, nan isa na Domingo jaon.

Sanan jari matud piktyur nan pamutang suga sa mga dayan sa lungsod.

Dili ra baja kon ako an nabesi, pati an lungsod siguro, para sa umaabot na pista, sigurado.