Pagboto sanan pamasbas

Sajo kami ni Neng nangadto sa Pilot (CPS) para mobotar para sa Barangay sanan SK eleksyon, tag-iban nam si Linvs.  Gamay pay tawo pag-abot nam, deretso kami dajon sa isigpresento namo.

Taghanap ko anay an sa ako kay bagan lain naman na room sa una na eleksyon, pero dali ko ra nakit-an ak ngayan, botar ak dajon. 

Samtang naghuyat-huyat kan Neng, namiktyur ak anay kay, of course, ibutang nasab sa blog. hehe Human nija boto, nanguli kami.  Pagkahapon, nokadto kami ni Linvs sa East (CECES), naglibot-libot tanaw nan pagbilang nan mga boto.  Dali ra an iban nahuman pagbilang, kay gamay ra siguro an botanti sa jadto na presento.

Kada presento may "watcher", jaon sa piktyur an pinakabata siguro na watcher. hehe Tagkopya nija an tanan boto nan ija kandidato.  Pagbalik ko sa Pilot, may pa gihapon nagbilang, mga alas siete nan duyom na siguro adto.  Human nila bilang, tanhatud an "election returns" sa opis nan COMELEC.  Unta nabilang pagdajaw an mga boto, para way gubot.

Kaina hapon na gajud ak nakapamasbas nan sagbot sa lubong ni Papa.  Buyos ak nan grass cutter, pag-abot ko sa sementeryo ampa nak hibaye habol baja, marajaw gani may sa silingan, tagpabuyos ako.  Alas sais nan duyom nak nahuman pamasbas, sindihan ko dajon ak kandila na daya.  Silom kan Popo Kid (tatay ni mama) nasab kami mamasbas sanan mamintal.

May na mga suga, tindahan sa sementeryo, may na gani mga bayong, naglalis uno tagpagawas si Erap.  Gikan siguro jadto sila sa videokehan, kay may na sab. hehehe  Kabibo lam, samot na kuman pista minatay.

Happy Halloween sab baja sa ijo!

Lain-lain

Halu, musta naman?  Pasensya karajaw, kuman pa nak ma-update an blog, an isa tuho na site (tilangnet.co.nr) an ak tagplastar anay, pero di pa gajud kon kompleto.  Sige lam, hinay-hinay samtang kanunay ra gud.

Nan miaging mga adlaw, nokadto ak sa munisipyo, nagbuyos ak nan mga retrato nan pag-Adlaw nan Cantilan kan Tony Arreo, para idugang pagbutang sa tilangnet na website.  Tagpabuslan nija sa ak an SD sanan flash disks, dabo-dabo sab mga piktyurs, may apil mga videos.  Ak dajon tag-upload an mga retrato, makita dire sanan dire.  Dagko tuho an size nan videos sanan hinay an internet connection dire, ugsa nadugay-dugay pagbutang sa youtube.  Paki-tan-aw rakan sa tilangnet an mga videos.

Didto sab matud ako sa opis nan COMELEC nan isa na adlaw, nangajo nan lista sa mga kandidato kuman Barangay sanan SK eleksyon.  Tagbutang ko sab sa tilangnet an lista, makita dire.  Permi lam i-check an site para sa resulta nan eleksyon kuman Lunes, Oktubre 29.  Hinaut unta padag-on nan mga Cantilangnon an angay magserbe dila, dili sa kon sinoy naghatag nan pinakadako. 

Hapit naman sab matud an Pista Minatay sanan Pasko, amo?  Silom mokadto siguro ak sa sementeryo, mamasbas nan sagbot sa lubong ni papa.  Kaina may na ak nakit-an namutang nan, laong pa "tseres" (Christmas lights o series) sa ila bayay.  Ugsa "Pista" sanan "Pasko" daan sa ijo! hehehe

Na uman, dire rakan anay kutob, tapuson pa nak pag-upload an iban na videos sa youtube. 

Adlaw Pasalamat

National Thank You Day baja kuman, sa ijo Salamat Karajaw.  Yay abtan ini blog kon ya kamo, utrohon ko, Salamat sa Ijo!

Adlaw nan at Lungsod

Mag duha ka gatos bayntesingko (225) ka tuig naman baja kuman an at lungsod, amo?  Ugsa, taglaong pa, isa balitaw sa pinakatiguyang na lungsod kun dili dinhi sa Surigao del Sur, sa tibuok Mindanao an Cantilan. 

Upat matud kaadlaw an selebrasyon, sugod nan petsa trese, Sabado hangtud kuman Martes.  Jari dire an iskedyul nan jaon na mga adlaw.  Yak kahibayo pila kaadlaw an pagpreparar, pero jari mga retratro sa ubos.

Nan isa na adlaw nak tagpiktyuran sa waya, tanhimo pa an mga booth; kahapon sa hapon jaon sa tuo.  Sa dayan matud jaon nan La Purisima tamutang an mga booth nan tanan Barangays sa Cantilan para sa Agro-Industrial Fair.  May opening parade nan Domingo, sayang lam yak makapamiktyur.  Punto na tawo kuno sa plaza, dabo paliton.  Sige lam basin jaoray kakopyahan nan mga retrato.

May Misa kaina buntag, human may "wreath laying" kan Fr Modesto Marzo lubong, na amoy nagpasimuno pamalhin dinhi sa bagong lungsod gikan nan dako na bagjo.  Adiser paniudto may mga parlor games anay sa plaza, arang kabibo, pagkahuman naniudto.  Hapit tanan booth siguro nagpakaon, pero didto rak sa bayay naniudto, namiktyur rakan ako. hehehe 

Jaoy Search for Matron Queen sanan Disco ng Bayan kuman duyom sa at Gym.  Dire sab an Barangay (Block Rosary) sa bayay.

An ak pangutana, uno namay kaha naabtan nan at lungsod gikan pag-agi nan pinakadako na orakan (hurricane) sa Daang Lungsod, hangtud sa pag-agi nan mga "npa" sa lungsod, pila na ka semana minlabay?    

Para dijo

Marajaw na adlaw sa tanan sanan sa at minahal na lungsod.  Kuman na Martes, disesais an Adlaw nan Cantilan.

Sa ya matud mahibayo, naghimo ako nan isa ka website para sa iban pa na mga karajawan dinhi sa at lungsod.  Nagtuo man gud ako na jaoy pa taglaung na "digital divide" dinhi sa at, ugsa para katulajan ini, amo jaon ak nahunahunaan.  Nakadumdom sab ako na may mga pahambing na ibutang dinhi sa blog, nakay di na isahay maapas pagbutang dinhi, naghimo rakan ako nan lain.  Amo matud ini an ngayan CANTILAN COMMUNITY NETWORK, an address -www.tilangnet.co.nr.

Di pa kintahay gajud kon kompleto, dabo pa kuyang, pero porma na hampan kon jaoy ijo mga pahambing, o rekomendasyon pwede ra gihapon nat idugang sa webpage.

Gikan nijo dinhi, tabok anay kamo sa pikas bayay. hehehe Para sa at ini, Cantilangnons mabuhi ta! 

Koronasyon

Tag-parade kaina sa hapon an rayna sanan hari kuman na tuig nan CECES, yak galing makapangutana kon kuno an koronasyon.  Amoy nay ak hindungan an tambor ni loloy sanan kitan an kiay ni neneng.  Sa ubos an mga piktyurs.

Diba pagkaduyom man human nan parade pagapurong-purongan an hari sanan rayna? Inday lam.

—————————————————————————-

(Update-October 10, 2007)

Buenas.  Kabii ra baja an koronasyon.  Ya man gud ak kadungog na nagtukar sa at Gym. 

Banda Pyuputo

Tagpalitan man nan duwaan an mga tagsa ni Linvs, nagbonding sila kaina, maghimo siguro nan banda pagdako nila.  Poy, kuyang kuno sila nan vocalist. hehehe  

Tagtuno ni Linvs an gitara, kay yabag kuno.

Ready na kuno sila, basin jaoy ganahan magpa-audition palista lam. hehehe

Haman naman matud jadto mga banda sauna, na amoy magtukar kon mag-amateur sa plaza?  Hay, nadumoduman ko ra lam, pagkuha ko nan retrato sa ila.

Kinatawohan nam

Ibutang ko lam an mga retrato nan pagselebrar nam nan am kinatawohan (birthday) nan Bernes sanan kaina, amo?  Sunod tuho an am birthday ni Neng (mrs), nan petsa singko an ak, ija kuman sais.

Nan Bernes taghatagan ak nan takyubo ni Beruth, manghud ni Neng, sanan may cake na gikan kan Maam Nancy Erlina, kaiban nak sa trabaho.

An handaay, may cake, manok, sinugba na isda, bola-bola, sanan di mawaya an pansit. hehehe  Dire manihapon mga kalumonan namo sanan silingan nan Bernes.

Kaina, lain an plano ni Neng, nag-children's party sija.  Mga bata nan kalumonan sanan silingan nagpapiktyur adiser mangaun.  Lingaw isab an mga bata.

Malipajon kami duha na tagtagaan kami nan utro na tuig nan am kinabuhi.  Hinaut unta na an Ginoo dili moundang sa paghatag nan grasya sanan karajawan, padajon kami pagdayig.

Sa tanan, salamat sa ijo hurot. 

Mintras bata pa 2

Nan Hulyo, may ak post dire, parte sa am bata (si Linvs), nan pagka-"fanatic" nija sa at bandera.  Hibayo kamo, hangtud kuman permi gihapon tapad an flag kun matuyog, magkalipay kun may hikitan sa tv, baro, butang misan uno ka gamay nan flag.  Gikan nan jadto pagpost nako, tagludluan ko man pagkanta nan "Lupang Hinirang", kuman memorize na nija.  Pamatia jaon sa ubos audio (tudahi lam an volume kun hinay ra).

Sa edad na duha, di pa karajaw malitok an iban na words, pero makalaong ako na lupos nija si Christian Bautista pagkanta nan ini. hehehe 

Nanghinaut ako na sa pagdako nija, di nija kalimtan an at "Lupang Hinirang".