Pakjaw

“Pakjaw, Pakyaw, Pacquiao”, dabo na meaning pero kaina, isa ra, an hinungdan na amora nahungon an mga problema sa Pilipinas.

Ako kaina, samtang dabo pa sab trabaho, nahunong anay, tan-aw away ni Pac-man.  Tagtext ak kaina nan ak igtagsa na jaoy live streaming sa internet.  Check nak an site, so samtang trabaho tan-aw sab sa internet.  Amo jadto taglaong pa na “multi-tasking”.  hehehe

Amo sab taghimo nan ak kaiban sa trabaho, samtang trabaho, tan-aw sab kan Pacman anay.

Sa pikas opisina, sa tv sila tan-aw, pero padajon gihap trabaho. 

Yay mga tawo an dayan sa lungsod kaina.  An iban didto sa Cantilan Gym nanan-aw, kay may video wall, nagpabajad an Cantilan Cable TV.

Kaganing unta may away si Pacman permi, para mahunong anay an mga problema sa Pinas.

Haaay, hinaut pa unta. hehe

Kon Martes

Laong ni RJ Jimenez (Pinoy Dream Academy 1st Batch) sa ija sikat na kanta, “Ang lungkot ng araw pagdating ng Tuesday; Everyday na sana tayong magkasama…“

Dire matud sija kahapon (coincidentally, Tuesday), nagconcert sa Cantilan Gym.  Dabo-dabo sab mangitaay, daya nam si Linvs, nangita sab kami.  Mga retrato matud sa ubos, dire, sanan video dire. 

May motorcade pagkahapon, milabay man sa SSIT, na tagkagubutan nan mga studyante.  Noagi ak sa Gym paguli ko piktyuran anay samtang ya pay tawo. 

Adiser kami nanuyod, piktyur nasab.  May anay premiro na banda nanganta, adiser kan RJ.  Blurred lam mga kuha ko, kay obsolete naman gud ak digicam. hehe pero sige lam, kay sa waya.   

Pagsugod ni RJ, piktyur-piktyur nasab, pati si Linvs nagpapiktyur. 

Nahimuot lam ako, misan hae si RJ singud, sunod-sunod gajud piktyur-piktyur. hehehe Timan-e kanat lagi retrato ni RJ sa Friendster.  Ako, ibutang ko sab.

Pero ok ra sa ako kon Martes, kay adlaw-adlaw man kami ni Wifey magkita, di kon parehas kan RJ.       

Linvs: "di, iskul na ta"

Belated Happy Father’s Day baja sa ako, sa mga tatay, papa, daddy sanan sa umaabot pa.  Yak kaupdate nan blog kahapon kay brownout man gud tibuok adlaw, sajo ra sab natuyog pagkaduyom kay kuman, premiro adlaw ni Linvs sa iskul.

Sajo ra sija kaina buntag nomata, excited moiskuyla.  Nagtraysikad sila ija Mommy pasingud sa iskuylahan, daya an bag na di ligid.   Adiser nagklase may flag ceremony.  Nagkalipay kay may flag nasab.

Pagkahuman, nanuyod kay magsugod na an klase.  May pa mga yaya sanan ginikanan sa suyod nan room kay an iban di magpabija.  Si Linvs, amo sab anay, pero naatikan ra.  Kadumdom man dajon ako nan amo pa sab ak na edad sa ija. 

Paningkamotan ko lam na mahihatag ko/namo, sakto na pamatasan na tagtuon sa am ni Papa.

“Pa, si Linvs nagiskuyla na.”  

Adlaw

Ikaduha na nako kuman ka tuig pagpost nan ato Adlaw nan Kaluwasan, an primero deri.  Pero bagan dabo namay kalainan, ya nay parade sanan iban pa, magkalipay naman tana dajon si Linvs makakita nan dabo na flag.  Hala rakan lam, basta di sija mautro sa pagkamahiligon sa flag.

Hikarian ta naman, nan Lunes nag”batch” matud kami, SSIT HS 1993.  May nagbakasyon (gikan  sa Canada) na am classmate sa highschool.  Didto kami mamahaw sa ila.  Human pamahaw, istorya-istorya anay sa mga panhitabo sa kinabuhi human highscool.  Jaoy mga retrato sa ubos.

Pagkahapon nan jadto na adlaw, may taglubong sa sementeryo.  Dabo-dabo sab mangibanay, nakay gabok-gabok naman lagi an mga poste nan tulay sa Casa, nahitabo ra gajud an dili tana mahitabo, nahugno an tulay.  An kapait pa gajud naapil an ak Mama sa pagkahugno, hapit intawon malumos.  Marajaw gani iban nija ako mga Auntie, amoy nagtabang sa ija.  Tsk tsk tsk 

Mga sobra o kuyang singkwenta (50) katawo an naapil, may mga samaran sanan sinawan.  Tiaw, amora kuno sila nagsakay nan “ferris wheel” pagkahugno.  Nanlutaw intawon an mga tsinelas, adtoy kuno pustiso kuhaon rakan kan Sir Pepe (”…naloko na”).

An ako lam ba pangutana, haman naman baja an mga taxes na tanbajad nan mga Cantilangnon?  An “mga kahoy na taghatag” kuno nan Puyat para sa tulay?  An ato halangdon na mga Public Servants, uno ramay ijo taghimo?  Maghuyat rakan lam ba ta nan adlaw na jaoy nasab mahitabo, adiser ta manlihok? 

Dili ini kon aja pagtudlo kanin-o sajop, gusto ra namo mahibayo.

Hubaron v0.1

Musta na, umay lingaw?

Ako, tagkalingawan nak kuman an paghimo nan machine translation (mt) program, Hubaron* an ngayan, javame an ak tagamit.  Jaoy retrato sa ubos.

Ya pa lam mahuman, ak ra ibutang dinhi para kon sinoy ganahan motesting.  Balik-balik lam para sa mga updates nan ini na project.

(*Hubaron - Translate) 

Brigada Eskwela, Linug, sanan iban pa

Marajaw na adlaw dijo tanan!

Nag-isa naman baja ka tuig ini ako blog.  An premiro nak na post Labor Day nan last year, mabasa dire, ya man lam palandunga na moabot nan isa ka tuig ini ato suyat-suyat ngari.  Hiut unta na hatagan pak nan mga insperasyon para makasuyat pako na ijo mabasa.

Hikarian ta naman, kuman na adlaw matud hangtud sa Sabado magsugod an Brigada Eskwela nan DepEd.  Dire si Undersecretary for Legal Affairs Atty. Sunga, nobisita.  Sayang ya lam nak karetratuhi.  Sa Pilot (CPS) matud jaon sa taas na retrato.

Nan kaina hapon, may linug.  4.7 an kakusgon, tansawan intawon kami dire, kay ka kusog adto.  Dumduman man dajon nat adto bag-o ra nahitabo sa China.  TagGoogle ko dajon, dire nak tagdownload jaon retato sa taas.

Na hala, dinhi rakan anay kutob kay alimpapajug pa anhi ak tagbati. hehehe